വിനോദ സഞ്ചാരികൾ സഞ്ചരിച്ച കാർ നെല്ലാംകണ്ടിയിൽ തലകീഴായി മറിഞ്ഞ് ഏഴ് പേർക്ക് പരിക്ക്

കൊടുവള്ളി: വിനോദ സഞ്ചാരികൾ സഞ്ചരിച്ച   കാർ നിയന്ത്രണം വിട്ട് തലകീഴായി മറിഞ്ഞ് ഏഴ് പേർക്ക് പരിക്ക്. ഗൂഡല്ലൂരിലേക്ക് വിനോദയാത്ര പോയി മടങ്ങുകയായിരുന്ന പാലക്കാട് കുമ്പിടി സ്വദേശികൾ സഞ്ചരിച്ച കാറാണ് അപകടത്തിൽപ്പെട്ടത്.

കുമ്പിടി സ്വദേശി ജാസിം (37), ജാസിമിന്റെ ടെക്സ്റ്റൈൽസിൽ ജോലി ചെയ്യുന്ന രഞ്ജിത്ത്, അഭിജിത്ത്, സിറാജ്, സ്വാലിഹ്, അനസ്,  അഖിലേഷ് എന്നിവർക്കാണ് പരിക്കേറ്റത്. ഇവരെ കോഴിക്കോട് മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു. ദേശീയപാതയിൽ നെല്ലാംകണ്ടി അങ്ങാടിക്ക് സമീപം രാത്രി 12: 20ന് ആയിരുന്നു അപകടം.

മറ്റൊരു വാഹനത്തെ മറികടക്കുന്നതിനിടെ എതിർ ദിശയിൽ വന്ന ലോറിയിൽ ഇ ടിക്കാതിരിക്കാൻ പെട്ടെന്ന് വെട്ടിക്കുകയായിരുന്നു. റോഡരികിലെ മതിലിൽ ഇടിച്ച് തലകീഴായി മറിയുകയായിരുന്നു. അതിനുള്ളിൽ കുടുങ്ങിയ ഇവരെ ഓടിയെത്തിയ നാട്ടുകാരും യാത്രക്കാരും ചേർന്നാണ് പുറത്തെത്തിച്ചത്.