വൈദ്യുതി ലൈനുകളിലേക്കും മറ്റും ചാഞ്ഞു നിൽക്കുന്ന മരക്കൊമ്പുകളും ചെടിപ്പടർപ്പുകളും നീക്കം ചെയ്യാൻ കർശന നിർദ്ദേശവുമായി കെ എസ് ഇ ബി.

ഇടവപ്പാതിക്കു മുമ്പായി വൈദ്യുതി ലൈനുകൾ, പോസ്റ്റുകൾ ട്രാൻസ്ഫോർമറുകൾ തുടങ്ങിയവയ്ക്കു മീതെ ചെടിപ്പടർപ്പുകൾ പടരുന്നതും മരച്ചില്ലകൾ ചാഞ്ഞ് നിൽക്കുന്നതും ഒഴിവാക്കാൻ എല്ലാ കെ എസ് ഇ ബി. സെക്ഷനുകളിലും സർക്കിൾ ഓഫീസർമാർ പ്രവൃത്തി ഏകോപിപ്പിക്കാറുണ്ട്.

ഇതിനായി എല്ലാ വർഷവും 65 കോടിയോളം രൂപയാണ് കെ എസ് ഇ ബി ചെലവിടുന്നത്. 

2022 ഏപ്രിൽ 22 നുനടന്ന സംസ്ഥാനതല അവലോകനത്തിൽ പ്രസ്തുത പ്രവൃത്തിയുടെ ശരാശരി പുരോഗതി 79 ശതമാനം ആണെന്ന് സർക്കിൾ ഓഫീസർമാരായ ഡെപ്യൂട്ടി ചീഫ് എഞ്ചിനീയർമാർ റിപ്പോർട്ടു ചെയ്തിട്ടുണ്ട്. പ്രസ്തുത പ്രവൃത്തിയിൽ താരതമ്യേന പിന്നോക്കം നിന്ന ഓഫീസർമാർക്ക് മെയ് 31-നകം പ്രവൃത്തി പൂർത്തീകരിക്കാൻ നിർദ്ദേശവും നൽകിയിട്ടുണ്ട്

ഈ പശ്ചാത്തലത്തിൽ 2022 ജൂൺ 1 മുതൽ സംസ്ഥാനത്തെ ഏതെങ്കിലും വൈദ്യുതി ലൈനുകൾക്ക് മീതെ മരങ്ങൾ അപകടമാം വിധം ചാഞ്ഞ് നിൽക്കുന്നതായോ ചെടിപ്പടർപ്പുകൾ വൈദ്യുതി തൂണിലോ കമ്പിയിലോ ട്രാൻസ്ഫോർമറുകളിലോ പടർന്നു കിടക്കുന്നതായോ കണ്ടാൽ അത് ജോലിയിൽ വന്ന വീഴ്ചയായി മാനേജ്മെന്റ് കാണുന്നതും ബന്ധപ്പെട്ട സർക്കിൾ, ഡിവിഷൻ, സബ് ഡിവിഷൻ, സെക്ഷൻ ഓഫീസർമാരെ ഇതിന് ഉത്തരവാദികളായി കാണുന്നതുമാണ്. തുടർന്ന് പ്രസ്തുത തടസ്സം ഒഴിവാക്കുന്നതിനായി കമ്പനി ചെലവിടുന്ന തുക മേൽപ്പറഞ്ഞ ഉദ്യോഗസ്ഥരിൽ നിന്നും തുല്യ തോതിൽ ഈടാക്കുന്നതുമാണ്

2022 ജൂൺ 1-ന് ശേഷം ഇപ്രകാരം കാണപ്പെടുന്ന ചെടിപ്പടർപ്പുകൾ, മരച്ചില്ലകൾ, വൈദ്യുതി തടസ്സം ഉണ്ടാക്കാൻ സാധ്യതയുള്ള മറ്റു നിർമ്മിതികൾ എന്നിവയുടെ ചിത്രങ്ങൾ പൊതുജനങ്ങൾക്ക് എടുക്കാവുന്നതും ഉത്തരവാദപ്പെട്ട സെക്ഷന്റെയും അയക്കുന്ന ആളിന്റെയും വിശദാംശത്തോടുകൂടി 9496001912 എന്ന വാട്സാപ്പ് നമ്പരിലോ കെ എസ് ഇ ബിയുടെ ഔദ്യോഗിക ഫെയ്സ്ബുക്ക് പേജിലേക്കോ അയക്കാവുന്നതുമാണ്. 

ഇപ്രകാരം അയക്കപ്പെടുന്നതും പോസ്റ്റ് ചെയ്യപ്പെടുന്നതുമായ വിവരങ്ങൾ വിലയിരുത്തി അത്തരം തടസ്സങ്ങൾ നീക്കം ചെയ്യുവാൻ വിതരണ വിഭാഗം ഡയറക്ടറുടെ നേതൃത്വത്തിൽ ഒരു മുഴുവൻ സമയ നോഡൽ ഓഫീസർ ഉണ്ടായിരിക്കുന്നതുമാണ്. 

ചിത്രങ്ങളോ വിവരങ്ങളോ അയക്കുന്നവർ അവ എടുക്കുന്ന തീയതിയും സമയവും ചിത്രത്തിലോ ഒപ്പമോ രേഖപ്പെടുത്തേണ്ടതാണ്.

നോഡൽ ഓഫീസർ - ഡെപ്യൂട്ടി ചീഫ് എഞ്ചിനീയർ (റ്റി.എ. ടു ഡയറക്ടർ -ഡിസ്ട്രിബ്യൂഷൻ) ഇ-മെയിൽ - ddkseb@kseb.in

ജൂലൈ 31 വരെ അയച്ചു കിട്ടുന്ന കഴമ്പുള്ള ചിത്രങ്ങളിൽ / വിവരങ്ങളിൽ ഏറ്റവും പ്രയോജനകരമായ 10 ചിത്രങ്ങൾക്ക് / വിവരങ്ങൾക്ക് കെ എസ് ഇ ബി ഉചിതമായ പാരിതോഷികങ്ങളും നൽകുന്നതാണ്.