🛑തിരുവനന്തപുരത്ത് പോസിറ്റീവ്, കൊച്ചിയില്‍ നെഗറ്റീവ്; ഇങ്ങനെ പറ്റിക്കരുത് പാവം പ്രവാസികളെ...!!!

28.12.2021 

മണിക്കൂറിന്‍റെ ഇടവേളയിൽ വിമാനത്താവളങ്ങളിലെ കോവിഡ്​ ഫലം മാറി മറിഞ്ഞത്​ വിവരിച്ച്​ അഷ്​റഫ്​ താമരശേരി

*ദുബൈ:* നാട്ടിലെ വിമാനത്താവളങ്ങളിൽ നടക്കുന്ന റാപിഡ്​ കോവിഡ്​ പരിശോധന ഫലത്തെ കുറിച്ച്​ പരാതികൾ വ്യാപകമായിരുന്നു. മണിക്കൂറുകളുടെ ഇടവേളയിൽ രണ്ട്​ വിമാനത്താവളങ്ങളിൽനിന്ന്​ രണ്ട്​ തരം ഫലം ലഭിച്ചതിനെ കുറിച്ച്​ വിവരിക്കുകയാണ്​ സാമൂഹിക പ്രവർത്തകൻ അഷ്​റഫ്​ താമരശേരി.

തിരുവനന്തപുരം വിമാനത്താവളത്തിലെ റാപിഡ്​ പരിശോധനയിൽ പോസിറ്റീവായതിനെ തുടർന്ന്​ നെടുമ്പാശേരിയിലെത്തിയ അദ്ദേഹം ഇവിടെ നടത്തിയ പരിശോധനയിൽ നെഗറ്റീവായി. തിരുവനന്തപുരത്തെ സ്വകാര്യ ചടങ്ങിന്​ ശേഷം​​ പുലർച്ചെ 2.55നുള്ള ഷാർജ വിമാനത്തിലാണ്​ ടിക്കറ്റ്​ ബുക്ക്​ ചെയ്​തിരുന്നത്​. നാല്​ മണിക്കൂർ മുമ്പ്​ വിമാനത്താവളത്തിലെത്തി 2490 രൂപ അടച്ച്​ റാപിഡ്​ ടെസ്​റ്റ്​ ചെയ്​തപ്പോൾ ഫലം പോസിറ്റീവ്​. ഇതോടെ യാത്ര ചെയ്യാൻ കഴിയില്ല എന്ന നിലപാടിലായി അധികൃതർ.

24 മണിക്കൂർ മുമ്പെടുത്ത ആർ.ടി.പി.സി.ആർ ഫലം നെഗറ്റീവായിരുന്നതിനാൽ ഒരിക്കൽ കൂടി പരിശോധിക്കണമെന്ന്​ അഭ്യർഥിച്ചു. അവർ വിസമ്മതിച്ചില്ലെന്ന്​ മാത്രമല്ല, പുറത്തേക്കുള്ള വഴിയും കാണിച്ചു കൊടുത്തു. അ​പ്പോൾ സമയം രാത്രി 11 മണിയായിരുന്നു. യു.എ.ഇയിൽ എത്തിയാൽ ഉടൻ രണ്ട്​ മൃതദേഹങ്ങൾ നാട്ടിലേക്ക്​ അയക്കാനുള്ളതിനാൽ മറുവഴി ആലോചിച്ചു. അങ്ങിനെയാണ്​ നെടുമ്പാശേരി വഴിയുള്ള യാത്ര ആലോചിച്ചത്​. തിരുവനന്തപുരത്ത് നിന്ന്​ ടാക്സിയിൽ നെടുമ്പാശ്ശേരി എത്തി. രാവിലെ 10.10ന് കൊച്ചിയിൽ നിന്ന്​ ഷാർജയിലേക്ക് പോകുന്ന വിമാനത്തിലായിരുന്നു ടിക്കറ്റ്​.

പുലർച്ചെ 4.45ന്​ നെടുമ്പാശ്ശേരിയിൽ എത്തി 2490 രൂപ അടച്ച് റാപിഡ്​ പി.സി.ആർ പരിശോധന നടത്തി. അരമണിക്കൂർ കഴിഞ്ഞ് ഫലം വന്നപ്പോൾ നെഗറ്റീവ്. ഏഴ്​ മണിക്കൂർ കൊണ്ട് കോവിഡ് നെഗറ്റീവായത്​ എന്ത്​ മാജിക്കാണെന്ന്​ അഷ്​റഫ്​ താമരശേരി ചോദിക്കുന്നു. നിരവധി പേരാണ്​ വിമാനത്താവളത്തിലെ റാപിഡ്​ ടെസ്​റ്റ്​ പോസീറ്റീവായതിനെ തുടർന്ന്​ മടങ്ങുന്നത്​. 48 മണിക്കൂറിനുള്ളിലെടുത്ത ആർ.ടി.പി.സി.ആർ ഫലം നെഗറ്റീവാകുന്നവർ മാത്രമാണ്​ എയർപോർട്ടിലെത്തുന്നത്​.

എന്നാൽ, ഇവിടെ നെഗറ്റീവാകുന്നത്​ മൂലം ടിക്കറ്റി​ന്‍റെ പണവും ടെസ്​റ്റ്​ ചെയ്​ത പണവും ഉൾപെടെ നഷ്​ടമാകുന്നു. റാപിഡ്​ പി.സി.ആർ നിരക്ക്​ കുറക്കണമെന്ന ആവശ്യം ഉയർന്നെങ്കിലും സർക്കാരുകൾ അതിന്​ മുന്നിൽ കണ്ണടച്ച്​ നിൽക്കുകയാണ്​.

*അഷ്​റഫ്​ താമരശേരിയുടെ ഫേസ്ബുക്ക് പോസ്റ്റിന്‍റെ പൂർണ രൂപം..👇🏻*

രണ്ട് ദിവസം മുമ്പ് ഒരു സ്വകാരൃ ചടങ്ങിൽ പങ്കെടുക്കുവാൻ തിരുവന്തപുരത്ത് വന്നതായിരുന്നു. ചടങ്ങ് കഴിഞ്ഞ് രാത്രി ഇന്നലെ 2.55 ന് (G9447) തിരുവനന്തപുരത്ത് നിന്ന് ഷാർജയിലേക്കുളള Air Arabia യുടെ വിമാനത്തിൽ യാത്ര ചെയ്യുവാനുളള തയ്യാറെടുപ്പിൽ 2490 രൂപ അടച്ച് Rapid Test ചെയ്തപ്പോൾ Result postive. താങ്കൾക്ക് നിയമപരമായി യാത്ര ചെയ്യുവാൻ കഴിയില്ലായെന്ന് ഉദ്യോഗസ്ഥരുടെ മുന്നറിയിപ്പ്, പുറത്തേക്കുളള വഴിയും കാണിച്ച് തന്നു.സമയം നോക്കിയപ്പോൾ രാത്രി 11 മണിയായി.24 മണിക്കൂറിന് മുമ്പ് എടുത്ത RTPCR ൻ്റെ Result ആണെങ്കിൽ നെഗറ്റീവും.ഒന്നും കൂടി ടെസ്റ്റ് ചെയ്യാമോ എന്ന് ഉദ്യോഗസ്ഥരോട് അപേക്ഷിച്ച് നോക്കി,ഒരു രക്ഷയുമില്ലാത്ത മറുപടി,ഗൾഫിൽ പോയി കൊറേണ ഒക്കെ കൊണ്ട് വന്നിട്ട് ഇപ്പോൾ ഇവിടെത്തെ മെഷീനാണ് കുഴപ്പം,ഇവിടെ നിന്ന് പൊയക്കോ സമയം കളയാതെ എന്ന ദാർഷ്ഠ്യം കലർന്ന മറുപടിയും.ടാക്സി സ്റ്റാൻഡിൽ നിന്നും ഞാൻ ആലോചിക്കുകയായിരുന്നു.രണ്ട് മയ്യത്തുകളാണ് എൻ്റെ വരവും കാത്ത് മോർച്ചറിയിൽ കിടക്കുന്നത്.തീരെ ഒഴിവാക്കുവാൻ കഴിയാത്തത് കൊണ്ടാണ് ഈ ചടങ്ങിലേക്ക് വന്നതും.ജീവിച്ചിരിക്കുന്നവരോട് പോലും ഒട്ടും ബഹുമാനമില്ലാത്ത ഈ ഉദ്യോഗസ്ഥന്മാരോട് മയ്യത്തിൻ്റെ കാര്യം പറഞ്ഞിട്ട് എന്ത് കാരൃം. ഒരു വഴിയും മുന്നിൽ കാണുന്നില്ലല്ലോ പടച്ചവനേ എന്ന് ചിന്തിക്കുമ്പോഴാണ് മനസ്സിൽ ഒരു ആശയം കിട്ടിയത്. നെടുമ്പാശ്ശേരി വഴി ഒന്ന് പോയി നോക്കാം എന്ന് കരുതി തിരുവനന്തപുരത്ത് നിന്നും ടാക്സിയിൽ നേരെ നെടുമ്പാശ്ശേരിക്ക്‌ വെച്ച് പിടിച്ചു. രാവിലെ 10.10 ന് കൊച്ചിയിൽ നിന്നും ഷാർജയിലേക്ക് പോകുന്ന IX 413 Air india express ൻ്റെ ടിക്കറ്റ് online ലൂടെ എടുക്കുകയും ചെയ്തു.വെളുപ്പാൻ കാലംം 4.45 ന് നെടുമ്പാശ്ശേരിയിൽ എത്തുകയും അവിടെയും 2490 രൂപ അടച്ച് Rapid Test ന് വിധേയമായി.അരമണിക്കൂർ കഴിഞ്ഞ് Result വന്നപ്പോൾ നെഗറ്റീവ്. നോക്കു Trivandrum ത്ത് നിന്ന് കൊച്ചിയിലേക്ക് വന്നപ്പോൾ എൻ്റെ കോവിഡ് മാറിയോ,വെറും,7 മണിക്കൂർ കൊണ്ട് കോവിഡ് മാറാനുളള മരുന്ന് ഞാൻ കഴിച്ചോ,പിന്നെ എന്താണ് ഇവിടെ സംഭവിച്ചത്.നിങ്ങളുടെ സംവിധാനങ്ങൾ ഇപ്പോഴും പഴയത് തന്നെയാണ്,അതുപോലെ നിങ്ങളുടെ മനോഭാവവും,ഇത് രണ്ടും മാറിയാലെ നമ്മുടെ സമൂഹം രക്ഷപ്പെടു.കേന്ദ്ര സംസ്ഥാന സർക്കാരുകൾ ഒന്ന് ആലോചിക്കണം.ഈ Quality യില്ലാത്ത മെഷീനും വെച്ച് Rapid Test ചെയ്യുവാൻ ഇരിക്കുന്ന സ്വകാരൃ കമ്പനികളെ നിങ്ങൾ ഒഴിവാക്കണം.എത്രയോ പാവപ്പെട്ട പ്രവാസികളാണ് Result postive ആണെന്ന് പറഞ്ഞ് ഇവർ തിരിച്ച് അയക്കുന്നത്.ഇത് മൂലം അവർക്കുണ്ടാകുന്ന നഷ്ടങ്ങൾ ആര് തിരിച്ച് നൽകും.ഇന്നലെ തന്നെ എനിക്ക് സമയവും പോയത് കൂടാതെ,സാമ്പത്തികമായി വലിയ നഷ്ടവും സംഭവിച്ചു.അധികാരികൾ ഇത്തരം കാരൃങ്ങൾക്ക് നേരെ കണ്ണടക്കരുത്.പ്രവാസികളെ ചൂക്ഷണം ചെയ്യുന്ന ഇത്തരം കാര്യങ്ങൾ അവസാനിപ്പിക്കണം.

_അഷ്റഫ് താമരശ്ശേരി_